Претседателката на Европската комисија, Урсула фон дер Лајен, во вторник објави дека таа и американскиот претседател Доналд Трамп, во разговор на маргините на Генералното собрание на ОН во Њујорк, се согласиле за потребата од намалување на приходите на Русија од фосилни горива, што Европа го прави со 19-тиот пакет санкции против Москва.
Фон дер Лајен во изјава нагласи дека Европската Унија го зголемува притисокот со 19-тиот пакет санкции со забрана за увоз на руски течен природен гас (LNG) на европските пазари и таргетирање на рафинериите, трговците со нафта и рафинериите во трети земји.
„До 2027 година, Европа засекогаш ќе сврти нов лист за руските фосилни горива“, рече Фон дер Лајен.
Таа рече дека разговарала со Трамп и за она што го нарече „провокации на Кремљ“, вклучувајќи ги и упадите во европскиот воздушен простор, што го смета за „обид да се тестира одговорот на Европа и НАТО“, се вели во соопштението на Европската комисија.
„Европа ги засилува своите одбранбени напори за зајакнување на своето источно крило. Мора да дејствува како штит и за Европа и за НАТО“, додаде таа.
Таа, исто така, рече дека ЕУ и САД ќе работат заедно за враќање на исчезнатите деца во Украина и ја нагласи важноста на соработката во решавањето на хуманитарните прашања, особено кога станува збор за Украина.
Таа додаде дека таа и Трамп се согласиле и за ситуацијата на Блискиот Исток.
„Конечно, разговаравме за ситуацијата на Блискиот Исток. Двајцата се согласуваме дека страдањето на цивилите мора да заврши. Европа цврсто стои обединета зад решението со две држави“, рече таа.
