Неидентификувани дронови се забележани над четири аеродроми во Данска, поради што еден од нив беше затворен неколку часа, соопшти данската полиција.
Според данските медиуми, беспилотни летала биле видени над аеродромите во Есјберг, Скирдструп, Сендерборг и Алборг, при што вториот е затворен за сообраќај. Алборг е град на север од Данска.
„Активностите со беспилотни летала го нарушуваат нормалното работење на аеродромот“
Портпаролот на аеродромот Алборг одби да коментира за бројот на пријавени дронови, но полицијата таму потврди дека е забележан голем број.
„Активностите со беспилотни летала го нарушуваат нормалното работење на аеродромот Алборг. Воздушниот сообраќај е затворен и сите летови се откажани од сега“, рече Јеспер Бојгард, началник на локалната полиција, додавајќи дека тие продолжуваат да ја следат и контролираат ситуацијата.
Полицијата, исто така, посочи дека останува прашање дали дроновите видени над Алборг се поврзани со оние видени пред два дена во Копенхаген.
Што се случи во понеделник?
Аеродромот во Копенхаген беше затворен речиси четири часа во понеделник вечерта откако неидентификувани дронови беа забележани над пистата, соопшти данската полиција.
Сличен инцидент беше пријавен истиот ден во Осло, каде што сообраќајот на аеродромот беше во прекин три часа. Норвешките власти сè уште не ги поврзале двата инцидента, но, според Ројтерс, тие се во постојан контакт со данските истражители додека истрагата за потеклото на дроновите продолжува.
Данска го покажува прстот кон Русија
Во изјава за националното радио, данската премиерка Мете Фредериксен го нарече појавувањето на беспилотни летала над аеродромот во Копенхаген најсериозен напад врз клучната инфраструктура на Данска досега: „Тоа кажува нешто за времето во кое живееме и за што ние како општество мора да бидеме подготвени“.
„Отворени сме за сите опции за тоа кој стои зад ова. Не можам да ја исклучам можноста дека е Русија. И тоа јасно се совпаѓа со развојот на настаните што ги видовме неодамна со други напади со беспилотни летала, кршење на воздушниот простор и сајбер напади врз европските аеродроми“, рече Фредериксен.
„Очигледно целта беше да се наруши сообраќајот и да се создадат немири. Да се создаде загриженост. Да се види до каде може да се оди во тестирањето на границите. Видовме дронови над Полска кои не требаше да бидат таму, видовме активност во Романија, нарушувања на естонскиот воздушен простор, имаме хакерски напад врз европските аеродроми во текот на викендот, а сега и дронови во Данска и Норвешка“, заклучи данскиот премиер.
Кремљ соопшти дека „нема докази“ за тврдењата за руска вмешаност во инцидентот и дека затоа „не ги сфаќа сериозно“.
