Висок функционер на Хамас изјави за Би-Би-Си дека палестинската група веројатно ќе го отфрли мировниот план на американскиот претседател Доналд Трамп, тврдејќи дека тој „им служи на интересите на Израел“ и „ги игнорира интересите на палестинскиот народ“.
Неименуваниот функционер рече дека е малку веројатно Хамас да се согласи на разоружување, клучен услов на планот на Трамп, и се спротивстави на распоредувањето на Меѓународните сили за стабилизација во Газа, сметајќи го за нова форма на окупација.
Израелскиот премиер Бенјамин Нетанјаху го прифати планот во понеделник во Белата куќа.
Водачите на Хамас во и надвор од Газа, како и други палестински фракции, учествуваат во разговорите.
Воениот командант на Хамас на терен, Ез ал-Дин ал-Хадад, е решен да ја продолжи борбата, додека членовите на Хамас надвор од Газа се маргинализирани бидејќи немаат контрола врз заложниците.
Палестинскиот исламски џихад, кој учествуваше во нападот врз Израел на 7 октомври, го отфрли планот вчера.
Клучна пречка за Хамас е барањето сите заложници да бидат предадени одеднаш.
Жителите на Газа во голема мера го поддржуваат планот, кој би можел да стави крај на војната.
Палестинскиот новинар Фати Саба рече дека отфрлањето од страна на Хамас би значело „зелено светло за Нетанјаху да ја продолжи војната со поддршка на САД и западните земји“.
Како што претходно беше објавено, Трамп вчера изјави дека му дава на Хамас „три до четири дена“ да одговори на мировниот план за Газа што го презентираше претходниот ден со Нетанјаху.
„Нема многу простор за преговори за предлогот. Ќе работиме околу три или четири дена. Ќе видиме како ќе оди. Сите арапски земји потпишаа. Сите муслимански земји потпишаа. Израел потпиша“, рече Трамп додека ја напушташе Белата куќа пред состанокот со високи воени претставници во воената база Квантико во Вирџинија.
Трамп рече дека ако Хамас не се согласи со договорот, тоа ќе биде „многу тажен крај“.
„Само чекаме Хамас, а Хамас или ќе го стори тоа или нема, а ако не го стори тоа, тоа ќе биде многу тажен крај“, рече американскиот лидер, објави Си-Ен-Ен.
