Најголемиот италијански синдикат повика на генерален штрајк во петок во знак на протест против начинот на кој Израел постапува со флотилата што требаше да донесе помош во Појасот Газа.
Од синоќа протести се одржуваат во голем број италијански градови , вклучувајќи го и Неапол, каде што демонстрантите ги запреа железничките линии на главната станица откако медиумите објавија дека околу 20 бродови се видени како се приближуваат кон меѓународната флотила, објави „Тајмс оф Израел“.
Претходно, израелското Министерство за надворешни работи соопшти дека израелската морнарица се качила на неколку бродови од Глобалната мировна флотила и привела активисти.
Министерството објави видео на кое се гледа како израелски војник ги предава работите на шведската активистка Грета Тунберг откако таа била приведена, објави „Тајмс оф Израел“.
Се забележува дека неколку бродови од флотилата се запрени и дека активистите што биле на нив се префрлаат во израелско пристаниште од каде што ќе бидат депортирани.
„Грета и нејзините пријатели се безбедни и здрави“, соопшти министерството.
Порано синоќа, израелската морнарица ја повика Глобалната мировна флотила, која се обидува да ја пробие израелската поморска блокада на Појасот Газа, да го промени курсот, објави израелското Министерство за надворешни работи.
Министерството објави видео на кое се гледа како поручник на морнарицата им кажува на активистите да се приближат до блокираната зона, објави „Тајмс оф Израел“.
„Ако сакате да доставите помош во Газа, можете да го направите тоа преку воспоставени канали. Ве молиме сменете го курсот кон пристаништето Ашдод, каде што помошта ќе помине низ безбедносен преглед, а потоа ќе биде префрлена во Појасот Газа“, рече поручникот на морнарицата.
Израелското Министерство за надворешни работи вели дека единствената цел на флотилата е провокација, бидејќи Израел, Италија и Грција ѝ понудија на флотилата мирно да достави помош во Појасот Газа.
Активистите на флотилата вечерва изјавија дека израелски воен персонал бил качен на нивните бродови.
Глобалната флотила од 47 бродови носи повеќе од 500 активисти, според организаторите.
Израел обвини некои клучни учесници во флотилата за врски со палестинската милитантна група Хамас.
