Прелиминарните резултати од изборите во Сирија покажуваат дека сунитите се мнозинство во парламентот

Сирија ги објави прелиминарните резултати од индиректните избори за својот прв парламент по соборувањето на Башар ал-Асад минатата година, во кој ќе доминираат сунитски муслимани, со многу мало присуство на жени и религиозни малцинства, објави Ројтерс.
Околу 6.000 членови на регионалните изборни колегиуми гласаа во неделата, избирајќи кандидати од претходно одобрени листи, како дел од процесот што ќе пополни речиси две третини од новото тело од 210 места.
Сирискиот претседател Ахмед ал-Шара подоцна ќе ја избере преостанатата третина.
Во деновите пред гласањето, аналитичарите и некои Сиријци изразија загриженост дека изборниот процес е премногу централизиран и дека суспензијата на изборите во областите надвор од контролата на владата значи дека сите заедници не се праведно застапени.
Според прелиминарните резултати објавени денес, изборната комисија на Сирија соопшти дека се избрани 119 пратеници, но не го наведе бројот на гласови што секој од нив ги добил.
Според Ројтерс, што беше потврдено од набљудувачите на изборите, шест од новите пратеници беа жени.
Набљудувачите рекоа дека вкупно 10 места им припаднаа на религиозните и етничките малцинства, вклучувајќи Курди, христијани и двајца Алавити, сектата на која ѝ припаѓа Асад.
Еден набљудувач го опиша новиот парламент како претежно сунитски муслимански и машки.
Навар Наџма, портпарол на Високиот изборен комитет на Сирија, беше прашан конкретно за застапеноста на жените и христијаните на прес-конференција.
„Меѓу најзначајните недостатоци на изборниот процес беа незадоволителните достигнувања во однос на застапеноста на жените во Сирија, како и фактот дека христијанската застапеност беше ограничена на две места, што е слаба застапеност во споредба со бројот на христијани во Сирија“, рече тој.
Наџма рече дека верува оти Шаара ќе се обиде да ги исправи недостатоците кога ќе ги назначи преостанатите 70 пратеници.
Властите велат дека прибегнале кон индиректниот систем на гласање поради недостаток на сигурни податоци за населението по војната, која одзеде стотици илјади животи од Сиријци и расели милиони.
Наведувајќи безбедносни и политички причини, властите го одложија гласањето во областите надвор од контрола на владата, вклучувајќи ги курдските области на север и североисток од Сирија, како и покраината Свеида, која ја контролираат Друзите, оставајќи 21 место празни.
Парламентот под Асад беше малку поголем, со 250 места, од кои две третини беа резервирани за членови на неговата партија Баас.