Дајан Китон, американска актерка која освои Оскар за улогата на девојката на Вуди Ален во романтичната комедија „Ени Хол“ од 1977 година, почина во саботата во Калифорнија на 79-годишна возраст, објави списанието „Пипл“, повикувајќи се на портпарол на семејството.
Други детали се непознати, а нејзиното семејство побарало да се почитува нивната приватност.
Китон, која се појави во повеќе од 60 филмови, вклучувајќи ја трилогијата „Кум“, „Клуб на првите сопруги“ и осум филмови со Ален, се издвои во Холивуд со својот впечатлив стил, андрогин изглед, ролки и капи.
Таа беше номинирана за Оскар за најдобра актерка за улогата на американската новинарка Луиз Брајант во политичката драма „Црвена“ од 1981 година, потоа за улогата на грижливата тетка на Леонардо Дикаприо во семејната сага „Собата на Марвин“ од 1996 година и за нејзината изведба покрај Џек Николсон во романтичната комедија „Љубовта нема правила“ од 2003 година.
Но, таа се етаблираше како актерка со филмот „Ени Хол“, кој Ален го направи инспириран од неговата врска со неа.
Китон беше и режисерка, сценарист, продуцентка и фотографка, а обожаваше и да реставрира куќи во Калифорнија.
Таа го опиша својот живот во мемоарите „Потоа повторно“ од 2011 година и „Да речеме само дека не беше убаво“ во 2014 година.
Таа беше позната и по своите романси со Ален, Ворен Бити, режисерот на филмот „Црвено“, и Ал Пачино, кој ги играше нејзиното момче и сопруг во „Кум“.
„Секој маж имаше различна деценија“, изјави таа за „Телеграф“ во 2012 година. „Вуди беше во моите дваесетти години, Ворен во триесеттите, а Ал во доцните триесетти и раните четириесетти години.“
