Американскиот претседател Доналд Трамп синоќа изјави дека не ја исклучува можноста за испорака на крстосувачки ракети „Томахавк“ во Украина, додавајќи дека овој потег би можел да го зголеми притисокот врз Русија и да помогне во завршувањето на војната.

Зборувајќи со новинарите во авионот „Ер Форс Уан“ на пат кон Блискиот Исток доцна синоќа, Трамп рече дека ќе разговара за ова прашање со Москва и праша: „Дали тие (Русија) сакаат „Томахавците“ да одат кон нив? Не мислам дека сакаат“, одговори тој.

Трамп додаде дека можеби ќе им каже на руските претставници: „Ако оваа војна не се реши, ќе им испратам Томахавци“.

Зеленски долго време  бараше Томахавк

Украинскиот претседател Володимир Зеленски во последните недели постојано бараше ракети „Томахавк“. Нивниот максимален дострел од 2.500 километри би ѝ овозможил на Украина да погоди цели како што се рафинерии за нафта, дури и во азискиот дел на Русија.

Трамп го опиша Томахавкот како „неверојатно“ и „многу офанзивно“ оружје, додавајќи: „И искрено, на Русија не ѝ е потребен“. Тој рече дека планира да разговара за ова прашање со Москва и дека го информирал Зеленски.

Иако ја нарече таквата испорака „нов чекор на агресија“, Трамп рече дека вреди да се покрене можноста бидејќи сака војната да заврши.

Пред Трамп да ги даде овие изјави, Зеленски рече дека тој и американскиот претседател разговарале за системите за воздушна одбрана „Патриот“ и „Томахавците“ во телефонски разговор.

Зеленски напиша на Телеграм дека Русија е загрижена за потенцијалната испорака на Томахавци од страна на САД и дека таков притисок би можел да помогне во постигнувањето мир. Тој не потврди дали се договорени некои конкретни чекори.

Зеленски претходно изјави дека Украина ќе ги користи ракетите „Томахавк“ само за воени цели и нема да напаѓа цивили во Русија, доколку САД ги испорачаат. „Никогаш не сме ги нападнале нивните цивили. Тоа е голема разлика помеѓу Украина и Русија“, рече украинскиот лидер за „Фокс њуз“.