Европскиот суд за човекови права (ЕСЧП) ѝ наложи на Русија да ѝ исплати на Грузија над 253 милиони евра за кршење на човековите права по војната во 2008 година,  објави „Еурактив“.

Судот ја осуди Москва за спречување на луѓето слободно да преминуваат во грузиските региони Абхазија и Јужна Осетија, кои Русија ги призна како независни по војната со Тбилиси во 2008 година.

Според ЕКЧП, Русија извршила прекршоци, вклучувајќи прекумерна употреба на сила, малтретирање, незаконско притворање и незаконски ограничувања на дневното движење преку административната гранична линија помеѓу територијата контролирана од Грузија и сепаратистичките грузиски региони поддржани од Русија.

Јужна Осетија и Абхазија сè уште се надвор од контрола на грузиската држава и се под руско влијание.

Судот во Стразбур ја осуди Москва да плати нешто повеќе од 253 милиони евра за штетите што ги претрпеле повеќе од 29.000 жртви.

Москва го напушти ЕСЧП во 2022 година по инвазијата на Украина, но судот тврди дека останува одговорна за сите прекршувања направени пред тоа.