Американскиот претседател Доналд Трамп потврди во средата дека ја овластил ЦИА да спроведува тајни операции во Венецуела.

Ова означува остра ескалација на напорите на САД да извршат притисок врз владата на претседателот Николас Мадуро, пренесува Ројтерс.

„Њујорк тајмс“ прв ја објави доверливата директива, повикувајќи се на американски претставници запознаени со одлуката, кои рекоа дека стратегијата на администрацијата на Трамп за Венецуела има за цел отстранување на Мадуро од власт. Администрацијата понуди 50 милиони долари за информации што ќе доведат до апсење и осуда на Мадуро по обвиненијата за трговија со дрога.

Трамп рече дека ја одобрил акцијата бидејќи големи количини дрога влегуваат во Соединетите Држави од Венецуела , голем дел по море.

„Сега гледаме на копно бидејќи морето е под контрола“, рече Трамп.

Тој постојано ја обвинуваше Венецуела  за трговија со смртоносната дрога фентанил, но податоците покажуваат дека Мексико е главниот извор.

Трамп одби да одговори на прашањето дали ЦИА имала овластување да го егзекутира Мадуро, велејќи: „Мислам дека Венецуела е под притисок“.

Трамп нареди големо зголемување на американските воени сили во јужниот дел на Карибите. Војниците извршија најмалку пет напади врз бродови што администрацијата на Трамп ги опишува како вклучени во трговија со дрога, без да даде докази.

Кампањата е најновиот пример за напорите на Трамп да ја користи американската воена моќ на нови и честопати правно контроверзни начини, од распоредување на активни американски трупи во Лос Анџелес до спроведување антитерористички напади против осомничени трговци со дрога.

Пентагон неодамна му откри на Конгресот дека Трамп утврдил дека САД се вклучени во „немеѓународен вооружен конфликт“ со нарко-картели.