Украинскиот претседател Володимир Зеленски денес по средбата со американскиот претседател Доналд Трамп изјави дека разговарале за безбедносни гаранции и ракети со долг дострел, но дека нема да дава никакви дополнителни изјави бидејќи, според него, САД „не сакаат ескалација“.
Украинскиот претседател додаде дека, меѓу другото, разговарал и за билатерални безбедносни гаранции со Трамп, пренесува CNN.
„Една од темите што ги разговаравме со претседателот Трамп беа безбедносните гаранции. Сакаме САД да бидат дел од безбедноста“, рече Зеленски, опишувајќи ја средбата со Трамп како „продуктивна“.
На прашањето на новинарите дали сè уште верува дека Трамп е сериозен во врска со дејствувањето против Русија, Зеленски одговори дека верува во САД.
„Им веруваме на САД. Веруваме дека претседателот (Трамп) сака да ја заврши оваа војна“, нагласи Зеленски, додавајќи дека се надева оти Трамп ќе успее во Украина „како што успеа на Блискиот Исток“. Претходно денес, Зеленски се сретна со Трамп, кој го пречека пред Белата куќа во Вашингтон, што е нивна трета средба оваа година, а средбата траела околу два и пол часа. Извори во украинската делегација изјавија дека средбата траела значително подолго од планираното, што се протолкува како знак за сериозноста на разговорите.
