Британскиот принц Ендру, кој денес објави дека се откажува од сите свои титули, вклучително и онаа војвода од Јорк, технички ја задржува војводската титула, бидејќи може да му се одземе само со одлука на парламентот, според Гардијан.
Тој ќе го задржи својот статус на принц како син на покојната кралица Елизабета II, но повеќе нема да ги користи благородничките титули или почести што му беа доделени, според неговата официјална изјава.
„Во разговорите со Неговото Височество Кралот, како и со неговото непосредно и пошироко семејство, заклучивме дека тековните обвинувања против мене го одвлекуваат вниманието од работата на Неговото Височество и кралското семејство“, рече принцот Ендру.
Принцот додаде дека ги негира сите обвинувања изнесени против него.
Кралот Чарлс наводно е задоволен од исходот, а консултирани се и принцот Вилијам од Велс и други членови на семејството.
Поранешната сопруга на Ендру, Сара, војвотката од Јорк, исто така повеќе нема да ја користи титулата, станувајќи едноставно Сара Фергусон.
Титулите на нивните ќерки, принцезата Беатрис и Евгенија, ќе останат непроменети.
Рејчел Маскел, пратеничката од Јорк Централ, повика на измени во законот во светлината на овие настани.
Законот, кој Маскел го поддржува, ќе му даде на кралот моќ сам да иницира отстранување на титулите или по препорака на парламентарен комитет.
„Откако се обидов да го променам законот со Законот за укинување на титулите, сега мислам дека е време за ова законодавство“, рече пратеничката Маскел.
Обвинувањата против Ендрју, кои го наведоа да се откаже од своите титули, се однесуваат на неговата врска со покојниот сексуален престапник Џефри Епштајн, како и на неодамнешните детали за неговата вмешаност во случај на шпионажа за Кина, објави британскиот весник.
Оваа недела, Гардијан објави извадоци од мемоарите на жртвата на Епштајн, Вирџинија Џуфре, која изврши самоубиство во април на 41-годишна возраст.
Ендрју постојано негираше дека имал сексуален однос со Џуфре кога имала 17 години и постигна вонсудска спогодба со неа за околу 12 милиони фунти, без да ја признае одговорноста.
„Гардијан“ исто така наведува дека Ендрју имал состаноци во 2018 и 2019 година со членот на кинеското Политбиро, Цаи Чи, за кого се сомневало дека е примател на класифицирани информации што двајца британски државјани обвинети за шпионажа наводно ги предале на Пекинг
