Европската унија размислува да го класифицира етанолот, состојка што се користи во многу средства за дезинфекција на раце, како опасна супстанца што го зголемува ризикот од рак, објавија „Ројтерс“ и „Фајненшл тајмс“.

Внатрешна препорака од 10 октомври од една од работните групи во рамките на Европската агенција за хемикалии (ECHA) го идентификува етанолот како токсична супстанца што го зголемува ризикот од рак и компликации при бременост и мора да се замени во средствата за чистење и другите производи.

Комитетот за биоцидни производи на ECHA ќе се состане помеѓу 25 и 28 ноември.

Регулаторот изјави дека доколку неговиот експертски комитет „заклучи дека етанолот е канцероген“, ќе препорача негова замена . Конечната одлука ќе ја донесе Европската комисија.

Европската агенција за хемикалии соопшти дека етанолот „сè уште може да биде одобрен за наменетата биоцидна употреба доколку се смета за безбеден со оглед на очекуваните нивоа на изложеност или доколку не се пронајдат алтернативи“, нагласувајќи дека сè уште не е донесена никаква одлука.

Светската здравствена организација ги класифицира и етанолот и изопропанолот како безбедни за употреба за хигиена на рацете.