Европската комисија (ЕК) ја претстави својата работна програма за 2026 година , соопшти прес-службата на ЕК. Во неа се наведени активности за изградба на посуверена и независна Европа.

Програмата на ЕК за претстојната година се нарекува „Час на независноста на Европа“. Таа се осврнува на сегашните и идните предизвици што произлегуваат од заканите за безбедноста и демократијата , конфликтите и геополитичките тензии, ризиците за економијата и индустријата и климатските промени. Работната програма се темели на обврските утврдени во Политичките насоки на претседателката фон дер Лајен, како и на идеите изнесени во нејзиното обраќање за состојбата на Унијата.

Агендата за 2026 година ќе се фокусира на намалување на бирократијата за луѓето, бизнисите и администрациите. Првиот прегледен извештај за поедноставување, имплементација и спроведување го истакнува напредокот постигнат досега во оваа област. Предлози за поедноставување на европското законодавство во сектори како што се автомобилската индустрија, животната средина, оданочувањето, безбедноста на храната, медицинските помагала и енергетските производи се планирани за следната година.

Комисијата, исто така , ќе продолжи со својата работа за зајакнување на индустриската база на Европа и стратешките индустриски сектори и работни места преку нов законски акт, Индустриски акцелератор. Комисијата, исто така, ќе работи на Европската иницијатива за безбедност на беспилотни летала и ќе даде приоритет на заштитата на границите, борбата против организираниот криминал и критичните прекугранични комуникациски системи.

Исто така, се предлага закон за квалитетни работни места, пакет за фер мобилност на работната сила и стратегија за добиток, вклучително и преглед на правилата за нефер трговски практики во синџирот на исхрана.

Комисијата ќе ја поддржи заштитата на демократските институции од екстремизам и дезинформации, ќе ја подобри заштитата на потрошувачите и ќе ги разгледа мерките против измами.