Министерката за рударство и енергетика на Србија, Дубравка Ѓедовиќ Хандановиќ, изјави дека земјата е во многу тешка и речиси безнадежна ситуација откако Советот на Европската унија донесе одлука со која се забранува транзитот на руски гас преку земјите-членки на ЕУ кон трети земји од 1 јануари 2026 година.
„Ситуацијата е речиси безнадежна“
Таа истакна дека, по оваа одлука, Бугарија нема да дозволи проток на руски гас преку гасоводот „Балкански тек“, што директно ќе влијае на Србија.
„Благодарение на добрите односи на претседателот на Србија, Александар Вучиќ, со водечките светски лидери, се надеваме дека ќе најдеме решение и ќе направиме сè што е во наша моќ, но ситуацијата е речиси безнадежна, особено имајќи ја предвид моменталната состојба во нафтената индустрија на Србија“, изјави министерот во писмена изјава.
Таа додаде дека Србија, иако „не учествувала во никаков конфликт“, се нашла засегната „без вина или грешка“.
И покрај сè, Ѓедовиќ Хандановиќ рече дека државата ќе направи сè граѓаните да не ги почувствуваат последиците од оваа ситуација.
