Се одложи рочиштето против моторџијата кој го прегази Југослав Николовски

Одложено е денешното судско рочиште на кое требаше да биде донесена пресуда за скопјанецот Ф.Љ. кој со мотор на 1 јули на пешачка патека го прегази Југослав Николовски и побегна.
Рочиштето е одложено поради отсуство на обвинетиот Ф.Љ. кој, како што беше кажано, бил на инфузија поради стомачен вирус.
Ф.Љ. е обвинет за тешки дела против безбедноста на луѓето и имотот во сообраќајот и за неукажување помош на лице повредено во сообраќајна незгода.
Обвинетиот со мотор „Кавасаки“ немал возачка дозвола и возел по пешачка патека спротивно на сообраќајните прописи, а откако го прегазил Николовски, побегнал од местото на настанот.
Пешакот беше пренесен на Ургентниот центар во Скопје, каде подоцна им подлегна на повредите.