Холандските онколози ги опишаа како „импресивни“ резултатите од новата американска студија која сугерира дека mRNA вакцините против коронавирусот би можеле да ја зголемат ефикасноста на имунотерапијата кај одредени видови рак на белите дробови и кожата.
Според студијата објавена во списанието „Nature“, пациентите со специфични видови рак на белите дробови кои ја примиле mRNA вакцината живееле во просек 37 месеци, што е 16 месеци подолго од невакцинираните пациенти, пишува NL Times.
Истражувањето опфатило повеќе од 1.000 пациенти.
Холандското друштво за медицинска онкологија (NVMO) и Холандското друштво на лекари за белодробни заболувања и туберкулоза (NVALT) изјавија дека резултатите „силно ги поддржуваат постојните сознанија за интеракцијата на mRNA вакцините и имунотерапијата“, но предупредија дека мора да се биде претпазлив при донесување заклучоци.
„Можно е невакцинираните пациенти да биле во полоша здравствена состојба, што влијаело на исходите“, рекоа експертите.
Онкологот и интернист Џон Ханен од болницата „Антони ван Левенхук“ изјави дека студијата не е дефинитивен доказ, но дава „силни индикации“ дека вакцините со mRNA можат да го зајакнат имунолошкиот одговор против ракот.
Ханен, исто така, посочи на други истражувања кои покажаа дека персонализираните вакцини со mRNA, насочени кон туморските протеини, можат дополнително да ги подобрат исходите кај пациентите со рак.
