Израелскиот министер за одбрана Израел Кац денес изјави дека се проценува дека 60 проценти од тунелите на палестинското милитантно движење Хамас остануваат функционални под Појасот Газа и мора да бидат уништени.
„Главната стратешка цел за консолидирање на големата победа што ја постигнаа херојските борци на Израелските одбранбени сили (ИДФ) против терористите на Хамас во Газа е демилитаризацијата на Појасот Газа, како и целосното уништување на терористичките тунели, од кои 60 проценти сè уште постојат, заедно со разоружувањето на Хамас“, рече Кац во објава на платформата X.
Тој рече дека го поставил уништувањето на тунелите како врвен приоритет за израелските сили во областа „жолта линија“ што ја контролираат, која според израелските власти опфаќа малку повеќе од 50 проценти од Појасот Газа.
„Им дадов инструкции на Израелските одбранбени сили (ИДФ) прашањето за уништување на тунелите да го направи централна мисија сега во жолтата зона под наша контрола, заедно со заштитата на војниците и заедниците, паралелно со дијалогот што го водиме со претставниците на Соединетите Американски Држави“, рече Кац.
