Коосновачот на Мајкрософт, Бил Гејтс, ги повика светските лидери да го променат својот пристап кон борбата против климатските промени, фокусирајќи се повеќе на адаптацијата, здравјето и отпорноста на општествата, а помалку на целта за намалување на глобалните температури, пред претстојните разговори за климата COP30 во Бразил.
COP30 ќе се одржи од 10 до 21 ноември во градот Белем, во долниот амазонски регион, каде што земјите ќе презентираат ажурирани климатски обврски и ќе го проценат напредокот во однос на целите за обновлива енергија договорени на претходните самити, објави Ројтерс.
Гејтс во својот блог рече дека светот веќе 10 години се обидува да ги постигне целите на Парискиот договор, ограничувајќи го глобалното затоплување на помалку од два степени Целзиусови над прединдустриските нивоа, но дека напредокот останува недоволен.
„Иако климатските промени се сериозни, тие не доведоа до крајот на цивилизацијата“, напиша Гејтс, додавајќи дека отпорноста би била подобро изградена со инвестирање во здравството, пристапот до енергија и земјоделството, особено во ранливите региони.
Тој рече дека подобрувањето на животот треба да биде во срцето на климатските стратегии што ќе се дискутираат на COP30.
Тој ги повика и донаторите и политичарите да разгледаат како се троши помошта за климата и да користат податоци за да ја направат поефикасна.
Гејтс, основач на мрежата за климатски иновации „Брејктру Енерџи“, рече дека смртните случаи од природни катастрофи се намалени за 90 проценти во изминатиот век, благодарение на подобрите системи за предупредување и поотпорната инфраструктура.
Неговите коментари следеа по повиците од генералниот секретар на ОН, Антонио Гутереш, и Светската метеоролошка организација (СМО), земјите да воведат системи за рано предупредување за заштита на населението од екстремни временски настани.
СМО соопшти дека во текот на изминатите 50 години, климатските и водните катастрофи одзеле повеќе од два милиони животи, од кои 90 проценти се случиле во земјите во развој.
