Белгискиот министер за одбрана, Тео Франкен, тврди дека НАТО ќе ја „срамни Москва со земја“ доколку Русија некогаш го нападне Брисел. Во опширно интервју, Франкен се осврна на низа итни стратешки прашања, вклучувајќи ја војната во Украина, европската одбрана и нуклеарното одвраќање, објави „Бриселс тајмс“ .

Кога беше директно прашан дали се плаши дека рускиот претседател Владимир Путин може да започне конвенционален ракетен напад врз Брисел, неговиот одговор беше недвосмислен: „Не, бидејќи тогаш тоа би го погодило срцето на НАТО, а потоа ние би ја срамниле Москва со земја“. Франкен изрази силна поддршка за американското лидерство во рамките на НАТО и ја повтори својата доверба во Член 5, клаузулата за заемна одбрана што е основа на Алијансата.

На прашањето дали американскиот претседател Доналд Трамп ќе го почитува Членот 5, Франкен одговори потврдно. „Секако дека би го почитувал. Во Европа има многу предрасуди кон американската влада. Зошто не би го почитувал Членот 5?“

„Хибридната војна е поголема закана“

Франкен истакна дека е повеќе загрижен за употребата на хибридно војување од страна на Русија отколку за заканата од конвенционален напад. „Крстосувачка ракета кон Брисел? Јасно е дека тоа би го активирало Член 5, без разлика која дефиниција ја користите. Путин нема да го стори тоа“, рече тој.

„Посклоен сум да го разгледам сценариото од сивата зона: „мали зелени луѓе“ кои го поттикнуваат рускојазичното малцинство во Естонија против „нацистичкиот режим“. Пред да се свестите, тие анексираа дел од Естонија“, објасни министерот.

„Идејата за европска армија продава магла“

Министерот за одбрана не покажа ентузијазам за идејата за заедничка европска армија. Тој ги критикуваше поголемите европски земји за „максимизирање на сопствените пазари“ и праша како земјите кои во моментов не можат ниту да соработуваат во набавката на одбранбена опрема би можеле да ги интегрираат своите национални армии.

„Секој што верува во европска армија продава лага“, рече тој. „За среќа, го имаме НАТО, кој повторно ја докажа својата ефикасност со воздушната одбрана во Полска и Естонија.“

Војска на улиците на Брисел

Покрај меѓународните прашања, Франкен зборуваше и за домашните проблеми, признавајќи дека има „однос на љубов и омраза“ со Брисел. Тој го поддржа повикот на Жорж-Луј Буше, лидер на франкофонските либерали (МР), војската да биде распоредена на улиците на белгиската престолнина за да ги контролира жариштата на трговијата со дрога.

„Ако не се справиме со војната против дрогата и несигурноста, ракот во Брисел ќе се шири понатаму“, предупреди тој. „Дали тоа бара војска на улиците? Ако е така, тогаш ќе го сториме тоа.“