Заменик-претседателот на рускиот Совет за безбедност Дмитриј Медведев, како одговор на заканите на белгискиот министер за одбрана Тео Франкен дека Москва ќе биде „срамнета со земја“ во случај на руски ракетен напад врз Брисел, го нарече белгискиот министер „имбецил“ и го предупреди „дека Белгија ќе исчезне“.
„Им честитам на сите руски пријатели (а особено на глупавиот белгиски министер за одбрана) за успешното тестирање на подводниот дрон Посејдон на нуклеарен погон. За разлика од Буревестник, Посејдон може да се смета за вистинско оружје за судниот ден“, напиша Медведев на платформата X.
Како одговор на корисник на мрежата кој предложи Белгија да се користи како полигон за тестирање, Медведев додаде: „Тогаш Белгија ќе исчезне“.
Белгискиот министер за одбрана сподели видео од коментарите на Медведев и напиша дека „главниот хулиган на Русија никогаш не престанува да се заканува и навредува“.
„НАТО не е во војна со Руската Федерација и сигурно не сака да биде… Но, принципот на „возвратен удар“ на нашиот сојуз е неоспорен веќе 76 години. Тоа е она што го мислев во интервјуто за (белгискиот весник) HUMO и не повлекувам ниту еден збор од него“, рече Франкен.
Тој апелираше до Медведев да се смири, користејќи го хитот од 2023 година „Calm Down“ од американската поп-пејачка Селена Гомез, објави Политико.
Руската амбасада во Белгија ги нарече изјавите на Франкен „провокативни и неодговорни“ и рече дека тие „не заслужуваат никакво внимание со оглед на нивната апсурдност и целосно одвојување од реалноста“.
