Британската полиција уапси две лица откако повеќе лица беа избодени со нож во воз што сообраќаше низ Кембриџшир. Инцидентот се случил навечер, а вооружени полицајци и служби за итни случаи реагирале на пријава за напад врз воз на LNER што сообраќал кон Хантингдон, јавува Би-Би-Си .

 X

Неколку лица се префрлени во болница

Според Британската транспортна полиција, повикот бил примен во 19:39 часот по локално време. Повеќе од 30 полицајци, вклучувајќи и вооружени полицајци, биле испратени на местото на настанот и уапсиле двајца мажи по пристигнувањето. Сè уште не е познато колку луѓе се повредени или сериозноста на нивните повреди. Полицијата продолжува да собира информации, а областа околу станицата Хантингдон останува блокирана.

„Голем број тимови, повеќе амбулантни возила, тимови за итен одговор и тимови за интензивна нега, вклучувајќи ги и хеликоптерските служби на воздушната амбуланта „Ист Англија“ и воздушната амбуланта „Есекс и Хертс“, беа испратени на железничката станица Хантингдон“, се вели во соопштението на службата за итни случаи.

„Можеме да потврдиме дека однесовме голем број повредени лица во болница. Понатамошни информации ќе објави Британската транспортна полиција“, додаде службата, а се шпекулира дека се работи за околу десет лица.

Сообраќајот целосно запрен

ЛНЕР, која управува со возови на главната источна линија во Велика Британија, потврди дека „сите линии помеѓу Стивениџ и Питерборо се затворени“ додека службите за итни случаи работат на местото на настанот.

„Имаме големи прекини во сообраќајот низ целата рута на ЛНЕР. Службите за итни случаи работат на инцидентот на станицата Хантингдон, сите пруги се блокирани. Нашиот совет е: не патувајте. Ако можете, одложете го вашето патување.“

Истрагата е во тек

Генералниот секретар на Националниот синдикат на железнички, поморски и транспортни работници (RMT), Еди Демпси, изјави дека е „длабоко загрижен од извештаите за повеќекратни напади со нож во воз на LNER вечерва“.

„Мислите на сите во RMT се со повредените, со вработените во железницата и со сите служби за итни случаи кои реагираат на овој инцидент во развој“, рече Демпси.

Истрагата за нападот е сè уште во тек, а полицијата засега не открива детали за можните мотиви.