Напад со украински беспилотни летала оштети петрохемиска фабрика во Стерлитамак, длабоко во Русија, објави Ројтерс.

Ударот предизвикал делумно уривање на постројка за пречистување на вода, но нема повредени.

Фабриката во регионот Башкортостан, на околу 1.500 км од украинската граница во Уралските Планини, работи без прекин, објави на Телеграм шефот на регионот, Радиј Хабиров.

Тој додаде дека двата беспилотни летала вклучени во ноќниот напад биле уништени.

Руското Министерство за одбрана во својот дневен извештај соопшти дека покрај двата беспилотни летала соборени над Башкортостан, неговите одбранбени системи уништиле 83 беспилотни летала над седум други руски региони.

Администрацијата на градот Стерлитамак, каде што се наоѓа фабриката, извести дека ниту еден од петте работници не е повреден.

Киев ги засили нападите со беспилотни летала и ракети со долг дострел во Русија, погодувајќи рафинерии за нафта, депоа и логистички центри за кои вели дека ја поттикнуваат воената машина на Кремљ.

Москва ги нарекува нападите тероризам, но Украина тврди дека тие се легитимна самоодбрана во војната што Русија ја започна во февруари 2022 година.