Синоќа голем пожар го зафати седмиот кат од зградата на домот за стари лица, а градоначалникот на Тузла, Зијад Лугавиќ, потврди за Klix.ba дека 11 лица загинале, додека 35 побарале медицинска помош.

Според информациите со кои располага Кликс, меѓу загинатите се жителите на домот кои биле на седмиот кат од зградата. Станува збор за неподвижни лица со сериозно нарушено здравје.

Лугавиќ рече дека меѓу повредените кои побарале медицинска помош има жители и вработени во домот, како и полицајци, пожарникари и медицински техничари. Според неофицијални информации, тројца од повредените се во критична состојба.

„Во осум часот ќе се одржи вонреден состанок на Градскиот совет на Тузла, по што ќе следи состанок на градоначалникот и на цивилната заштита. По тој повод ќе планираме понатамошни активности, но откако истражните органи ќе го завршат својот дел од работата“, изјави Лугавиќ за Klix.ba.

Зградата на домот за стари лица ја обезбедуваат утрово припадници на Полициската управа на Министерството за внатрешни работи на Тузланскиот кантон. Според претходните информации, жителите се на обезбедени катови од зградата, во делот што не беше зафатен од пожарот.

Зошто најранливите беа на највисоките катови? За овој дом е предупредувано со години, но никој не презеде ништо.

Трагедијата е дополнително продлабочена од шокантниот факт дека на горните катови, каде што избувна пожарот, биле сместени најранливите жители – луѓе со деменција и тешки форми на рак, пишува Klix.ba.

Вознемирената јавност со право го поставува прашањето кој и врз основа на која логика донел одлука за сместување на тешко болни луѓе на петтиот, шестиот и седмиот кат од зградата, со што драстично се намалиле нивните шанси за евакуација.

Жителите на домот и нивните семејства, како и одредени политичари во Тузла, со години предупредуваат за лошите услови во домот за стари лица, но одговорните остануваат глуви на нивните апели и предупредувања.

И покрај предупредувањата за лошите услови, раководството, предводено од директорот Мирсад Бакаловиќ (СДП), во јануари донесе одлука да ја зголеми цената на сместувањето за дури 30 проценти.

Пред помалку од два месеци, советничката од Наша партија во Градскиот совет на Тузла, Драгана Гагро Берберовиќ, го привлече вниманието на јавноста кон условите во кои живеат жителите на Домот за стари лица во Тузла. Објавеното видео и фотографии ја вознемирија јавноста, а раководството на Домот покрена постапка против Гагро Берберовиќ.