Основното јавно обвинителство Скопје донесе наредба за спроведување истражна постапка и поднесе предлог за определување мерка притвор против лице осомничено за разбојничка кражба, казниво по член 238 став 1 од Кривичниот законик.
Како што е наведено во соопштението на Јавното обвинителство на Република Северна Македонија, осомничениот на 19 октомври со цигла го скршил стаклото од прозорецот на спалната соба во куќа на улицата „Благоја Стефковски“ во Скопје, потоа влегол во куќата, пребарувал низ просториите и одзел 1.580 евра и 2.000 денари.
Во моментот кога се обидел да го напушти местото, сопственикот на куќата го затекнал и се обидел да го спречи, но осомничениот физички го нападнал и го турнал во грмушките во дворот, по што избегал од местото на настанот.
Обвинителството предложило мерка притвор поради постоење опасност од бегство, можност осомничениот да влијае врз сведоците и оштетениот, како и ризик од повторување на делото.
