Украинскиот претседател Володимир Зеленски денес изјави дека има околу 314 руски војници во Покровск, стратешки важен град во источна Украина за кој Москва тврди дека е опколен.
Зеленски оцени дека ситуацијата во Покровск останува тешка и дека целта на руските сили е брзо да го окупираат градот.
Според него, за три дена се регистрирани 220 напади врз Покровск, пренесува Укринформ.
Зеленски истакна дека е многу важно Русија да го освои Покровск за да демонстрира успеси на бојното поле и „да го промовира наративот дека наводно ќе може да го освои целиот Донбас“.
Според него, овој фактор може да влијае и на напредокот на санкциите против Русија, како и на нивното одложување.
Покровск е стратешки важна точка во регионот Донецк, и доколку руските сили го освојат, тие би биле поблиску до воспоставување контрола врз целиот Донбас.
Руски извори тврдат дека ги опколиле украинските сили во областа и спроведуваат стратегија на „клешти“, што официјален Киев го негира.
