Доскорешниот градоначалник на Општина Карпош, Стевчо Јакимовски, го оцени како најуспешен неговиот четврти мандат како прв човек на општината, кој воедно му е последен откако во неделата загуби во вториот круг на локалните избори од кандидатот на ВМРО-ДПМНЕ, Сотир Лукровски, кој ќе ја наследи функцијата.
Јакимовски ова го кажа на неговата последна прес-конференција како градоначалник на општината, на која даде отчет за сработеното во последниот од четирите градоначалнички мандати, осврнувајќи се особено на финансиската кондиција во која ја остава Општина Карпош.
„Јас сум горд на овој мандат затоа што работвме во извонредно тешки услови, пред сè со блокирана сметка, со минимални приходи од комуналии, со целосна блокада во делот на Советот, со страшни пресуди што удрија по буџетот на Општина Карпош, како и други екстерни удари што ги добив лично како градоначалник, пред сè онаа фамозна „црна листа“ (на САД н.з.) пресудата на Судот, здравствените проблеми што ми се јавија, тешката операција што ја преживеав. И јас мислам дека за мене ова е најуспешен мандат од сите четири коишто сме ги имале, затоа што со искуството што го поседувам, со знаењето што го поседувам со најголема леснотија ги разрешивме сите овое проблеми и граѓаните на Карпош не почувстуваа никаков недостаток“,рече Јакимовски, одговарајќи на новинарско прашање.
Претходно, осврнувајќи се на финансиската состојба, тој рече дека општинската каса ја остава со 72 милиони денари на жиро-сметка и со измирени тековни обврски.
Во одговор на новинарско прашање, рече дека во оваа сума не влегуваат приходите што општината ги добива од државата, а кои досега изнесуваат над 750 милиони денари.
„Наши сопствени приходи до крајот на годината очекуваме уште стотина милиони денари, што значи дека со овие 700 милиони ќе дојде скоро до 800 милиони денари, што е рекорден приход. Инаку, морам да ви кажам дека во 2016 година, во претходниот мандат до 2017 година, беше рекордна со 600 милиони денари приход. Во 2017 година имавме 650 милиони приход и потоа почна да паѓа на 420 милиони денари, па на 360 милиони денари, што значи дека секогаш кога јас сум градоначалник на општината приходите се качуваат. Обично имаме стручњаци за трошење, ама немаме стручњаци за зголемување на приходите“,кажа Јакимовски.
Тој кажа дека општината во последниот свој мандат за градоначалник ја презел со шест милиони приход и 6,5 милиони евра долг.
Јакимовски на прес-конференцијата кажа дека во моментот во Карпош се гради само една висококатница и два објекта во Момин Поток и три помали објекти од пет ката, за разлика од други општини во кои, како што кажа, во моментот се градат над 80 станбени објекти повисоки од шест ката.
„Ова само покажува колку сме биле вешти во менаџирањето на приходите и како општина Карпош, со покачување на даночните приходи успеа да ја стабилизира општината и од истата да направи самоодржлив проект“,рече тој.
Рече дека е особено горд на општинската зграда што ја остава, а за која, како што нагласи, идејата била сите подрачни единици на Владата да бидат сместени во неа и граѓаните на едно место да ги добиваат услугите.
„Тоа е инвестиција што сè уште е во тек, има уште 250 до 300 000 евра да се вложи во неа и тоа ќе биде зграда за пример што една локална самоуправа ја направила сама со сопствени средства. Да потсетам дека најголем дел од општините и Градот Скопје и понатаму битисуваат во бараките што се донација од нашите пријатели по земјотресот“,изјави Јакимовски.
На новинарско прашање кои се неговите планови откако ја загуби изборната трка, Јакимовски рече дека од 31 декември годинава заминува во пензија.
„Јас сега ќе се пријавам во фирмата на мојата сопруга и од 31.12., согласно биолошките закони, јас заминувам во пензија“,рече Јакимовски.
На вториот круг од локалните избори што се одржаа на 2 ноември кандидатот на коалицијата „Искуство за успех“, Стевчо Јакимовски, освои 12 378 гласови, а кандидатот на ВМРО-ДПМНЕ, Сотир Лукровски, доби 13 512 гласа.
