Кога има најнови вести поврзани со терористички напади или природни катастрофи, Би-Би-Си ги следи во живо и час по час преку таканаречените „тикери“. Од недела вечерта, кога генералниот директор на тој јавен сервис на Велика Британија, Тим Дејви, и уредничката на информативната програма, Дебора Тернес, поднесоа оставка, тикерот за самата Би-Би-Си е активен на веб-страницата на Би-Би-Си. Кризата е толку голема, настаните се толку турбулентни.

Трамп бара извинување и отштета

И покрај извинувањето на Шах, Трамп сега ѝ се заканува на Би-Би-Си со тужба од повеќе милијарди долари. На прашањето дали ќе му се извинат лично на Трамп, Шах рече дека добиле писмо од претседателот и ќе размислат како да одговорат. Адвокатите на Трамп ѝ дадоа на Би-Би-Си рок до петок во 23:00 часот по средноевропско време да ги исполни неговите барања.

Адвокатите за медиуми велат – мали шанси за успешна тужба

Документарецот повеќе не е достапен на медиумската библиотека iPlayer на Би-Би-Си и никогаш не е емитуван во Соединетите Американски Држави. Тоа би можело да биде проблематично ако Трамп одлучи да тужи, според медиумскиот адвокат Марк Стивенс во извештај на Би-Би-Си. Што се однесува до штетите, Трамп ќе мора да докаже дека филмот – емитуван неколку дена пред изборите на кои победи – всушност му предизвикал штета.

Стивенс додава дека угледот на Трамп веќе е нарушен преку девет тужби, бројни конгресни сослушувања и светско известување за неговата улога во нападот врз Капитол. Против него се во тек и други процеси. Би било тешко да се докаже дека емисијата „Панорама“ дополнително му наштетила на угледот, вели адвокатот.

Постојани тужби против медиумите

Од почетокот на својот мандат, Трамп веќе тужеше голем број американски медиуми или им се закануваше со тужби. Понекогаш добиваше значителни суми преку спогодби. Така, на пример, CBS News плати 16 милиони долари откако Трамп ја обвини дека го скратила излагањето на неговата противничка Камала Харис во нејзина корист.

Тој неодамна се закани дека ќе ја тужи и Си-Ен-Ен. Медиумскиот аналитичар на Си-Ен-Ен, Брајан Стелтер, ја советува Би-Би-Си во емисијата „Newsnight“ да остане смирена: Трамп понекогаш тужи, честопати не. Според неговото искуство, подобро е силно да му се спротивставите отколку да попуштите на заканите. Стелтер е исто така убеден дека Трамп дури и не го гледал спорниот документарец, бидејќи многу од неговите поддржувачи се појавуваат во филмот – што всушност треба да ѝ одговара на Белата куќа.

Британскиот министер за култура ја поддржува Би-Би-Си

Би-Би-Си се соочува со егзистенцијални одлуки. Дали треба да се согласи со барањата на Трамп? Дали треба да преговара за отштета или да ризикува тужба? Ова се проблемите од повеќе милијарди долари во моментов, усложнети од внатрешна криза – губење на лидерството и обвинувања за наводна пристрасност.

Министерката за труд и култура, Лиса Нанди, јасно застана на страната на јавната служба во парламентот и ја предупреди опозицијата да не ја користи кризата со Би-Би-Си за политички пресметки.

„Оние кои ја напаѓаат Би-Би-Си од левата или десната страна затоа што не го делат нивниот став, треба да разберат што е во прашање сега“, рече Нанди. „Постои фундаментална разлика помеѓу посочувањето на вистинските грешки и постојаното напаѓање на самата институција.“