Европската комисија лансираше алатка за пријавување на информации за вештачка интелигенција, првенствено наменета за професионалци за развој на вештачка интелигенција кои ќе можат да пријават сомнителни прекршувања на Европскиот закон за вештачка интелигенција.
Европската канцеларија за вештачка интелигенција, основана во рамките на Европската комисија, наведува дека воспоставила безбеден комуникациски канал за поединци кои сакаат да пријават проблем и на тој начин да придонесат за безбеден и транспарентен развој на нови технологии, објавува Euractiv.
Пријавите се поднесуваат анонимно на кој било јазик на Европската Унија и можат да бидат поткрепени со релевантни документи и за време на првичното поднесување и за време на двонасочната комуникација со Канцеларијата за вештачка интелигенција преку безбедно сандаче.
Правната заштита за луѓето кои ќе изберат да пријават прекршувања на правилата, сепак, ќе започне дури во август 2026 година, кога ќе стапи во сила делот од Законот за вештачка интелигенција што се однесува на заштитата на пријавувачите. Дотогаш, оние кои пријавуваат неправилности може да бидат изложени на ризик од одмазда од нивните работодавци, предупредува бриселскиот весник.
