Парламентот на Молдавија гласаше за затворање на рускиот културен центар, објави Ројтерс. Тоа беше нов обид за намалување на влијанието на Москва во земјата. Одлуката дојде еден ден откако рускиот амбасадор беше повикан поради упади со беспилотни летала што Молдавија ги опиша како неприфатливи.

Педесет и седум пратеници во парламентот со 101 место ја поддржаа мерката. Владејачката Партија за акција и солидарност на проевропската претседателка Маја Санду има мнозинство во собранието.

Владата изјави дека Рускиот центар за наука и култура во Кишињев би можел да послужи како алатка за промовирање наративи што претставуваат закана за безбедноста на Молдавија.

Од правни причини, центарот ќе остане отворен до јули 2026 година. За неговото затворање се дискутира со месеци.

Министерот за култура, Кристијан Јордан, рече дека владата не е во можност да ја утврди природата на активностите на центарот , бидејќи „не предложил ниту еден заеднички проект или настан“ од 2021 година.

Од друга страна, опозициските партии кои се пријателски настроени кон Русија, истакнаа дека владата не е во можност да обезбеди ниту еден пример за нелегална активност.

Молдавското Министерство за надворешни работи прво побара затворање на центарот по упадите со беспилотни летала во молдавскиот воздушен простор претходно оваа година.

Рускиот амбасадор Олег Озеров изрази сомнеж дека едно од дроновите прикажани пред Министерството за надворешни работи е поврзано со вистинска инвазија и посочи дека инцидентот имал за цел да ги расипе веќе лошите односи на Москва со Кишињев.

Русија ја обвинува Молдавија дека спроведува „русофобична“ агенда за дејствија непријателски настроени кон Москва. Секоја страна протера дипломати од другата, а најновиот таков случај беше во април.