Германскиот канцелар Фридрих Мерц изјави, по вечервашните разговори во Брисел со претседателката на Европската комисија (ЕК) Урсула фон дер Лајен и белгискиот премиер Барт де Вевер за замрзнатите руски средства, дека сите земји мора да сносат ист ризик кога станува збор за блокирани руски средства.
Мерц рече дека имал конструктивен дијалог со фон дер Лајен и Де Вевер и признал дека Белгија е оправдано загрижена за можноста за користење на замрзнатите руски средства, објави фламанската телевизија VRT.
„Се согласуваме дека, со оглед на моменталната геополитичка ситуација, времето е од суштинско значење за дејствување. Финансиската поддршка за Украина е клучна за безбедноста на Европа.
Вечерва имавме многу конструктивна размена на мислења на оваа тема. Специфичните загрижености на Белгија за потенцијалното користење на замрзнатите руски средства се неоспорни и мора да се решат во секое потенцијално решение, така што сите земји ќе сносат ист ризик“, рече Мерц.
Тој најави дека дискусијата за користење на замрзнатите руски средства ќе продолжи на самитот на ЕУ на 18 декември.
Разговорот на Мерц и фон дер Лајен со белгискиот премиер Барт де Вевер во Брисел за замрзнатите руски средства траеше околу два часа.
Тие пристигнаа во резиденцијата на Де Вевер кратко по 19 часот.
Мерц и фон дер Лајен сакаат да го убедат Де Вевер во планот на Европската комисија да користи замрзнати руски средства за да ѝ помогне на Украина.
Од друга страна, Белгија сака цврсти гаранции од земјите-членки на ЕУ дека ќе учествуваат во покривањето на ризиците.
Белгија сè уште не ги добила овие гаранции доволно јасно, претходно изјави белгиската влада.
