Бугарскиот претседател Румен Радев вчера изјави дека со впишување на Бугарите во Уставот Македонија значително ќе го забрза присоединувањето кон Европската Унија.
– Вклучувањето на Бугарите во Уставот на РСМ значително ќе го забрза патот на земјата кон ЕУ и се надевам дека нашиот југозападен сосед ќе го стори тоа што е можно поскоро за да си ги отвори вратите за преговори за полноправно членство – изјави Радев на приемот за претставниците на организациите на Бугари од Македонија.
КАј него на поклонение повторно беа Бугари од Скопје, Битола, Охрид, Прилеп, Кавадарци и Кочани.
Тие пак, пред шефот на бугарската држава категорично се изјаснилепротив уставни измени со одложено дејство, бидејќи станувало збор за гарантирање на основните човекови права, пишуваат бугарските медиуми
„Европската интеграција на Македонија е желба на сите, но не може да се случи по цена на правата на бугарската заедница“, истакна Радев, нагласувајќи дека секоја демократска држава има обврска да го гарантира правото на самоопределување и еднаквоста на сите свои граѓани. Со ова бугарскиот претседател уште еднаш го повтори ставот дека Софија ќе го мери напредокот на Скопје и низ призмата на статусот и заштитата на оние што се идентификуваат како Бугари.
Радев потсети и на таканаречениот „европски компромис“ договорен во 2022 година, кога Северна Македонија прифати пакет заклучоци и билатерален протокол со Бугарија како рамка за отворање на преговорите со ЕУ. Внесувањето на Бугарите во Преамбулата на Уставот беше поставено како услов за премин во следната фаза од процесот – отворање на нови кластери и поглавја од преговорачката рамка.
И додека во Скопје уставните измени остануваат предмет на жестока политичка полемика и поделени толкувања околу тоа дали станува збор за минимален европски услов или за длабок идентитетски компромис, во Софија доминира очекувањето дека институциите во Македонија ќе го испорачаат договореното. Пораката на Радев кон претставниците на бугарската заедница беше дека Бугарија „не се откажува“ од поддршката за македонското членство во ЕУ, но дека таа ќе продолжи да биде врзана за конкретни чекори во заштитата на нивните права.
Со тоа, уставните измени уште еднаш се потврдуваат како клучна проверка – и за способноста на македонскиот политички систем да обезбеди двотретинско мнозинство, и за подготвеноста на Бугарија да го одблокира следниот чекор кон членството во Европската Унија.
