Шведска постепено ќе ја укине помошта за развој за пет земји во наредните години и ќе ги искористи парите за да ја зголеми поддршката за Украина, објави Ројтерс.
Скандинавската земја планира постепено да ја укине помошта за Зимбабве, Танзанија, Мозамбик, Либерија и Боливија, изјави министерот за меѓународен развој и надворешна трговија Бенџамин Дуса.
„ Украина е најважниот приоритет на Шведска во надворешната политика и политиката за помош , затоа владата ќе ја зголеми помошта за Украина на најмалку 10 милијарди круни (1,06 милијарди долари) во 2026 година“, истакна тој.
Владата соопшти дека мерките ќе ослободат повеќе од 2 милијарди круни во текот на следните две години, кои би можеле да бидат пренасочени кон Украина за да се користат во проекти како што е обновата на енергетската инфраструктура на земјата.
Шведска веќе ја намали помошта за над десет земји откако сегашната влада ја презеде функцијата во 2022 година, вклучувајќи ги Буркина Фасо и Мали.
Шведска е главен донатор на помош за развој и хуманитарна помош, со буџет од 56 милијарди круни годишно во последните три години.
Владата објави дека ќе го намали овој буџет на 53 милијарди круни годишно за периодот 2026-2028 година и ги прераспредели приоритетите на трошењето, вклучително и користење на дел од парите за плаќање на трошоците за имиграција и репатријација на мигранти.
