Швајцарија ќе го намали бројот на борбени авиони „Локид Мартин Ф-35А Лајтнинг II“ што ќе ги купи од Соединетите Американски Држави за да остане во рамките на првичниот буџетски план откако цената на нарачката се зголеми, објави Ројтерс.
Берн го избра F-35A како свој борбен авион
од следната генерација во 2021 година за фиксна цена од 6 милијарди швајцарски франци (7,54 милијарди долари) за 36 авиони. Сепак, САД подоцна изјавија дека таа сума е недоразбирање.
По состанокот, владата објави дека му наложила на Министерството за одбрана да купи што е можно повеќе F-35A во рамките на буџетот од 6 милијарди швајцарски франци за нови авиони, што беше одобрено со тесно мнозинство од јавноста на референдум во 2020 година.
„Поради предвидливото надминување на трошоците, одржувањето на првично планираниот број од 36 авиони Ф-35А не е финансиски изводливо “, забележа владата.
Ова лето, швајцарската влада ја потврди својата посветеност на купување на авионите дури и откако САД воведоа царина од 39% за швајцарскиот извоз. По договорот постигнат минатиот месец, Швајцарија во среда соопшти дека тие царини сега се намалени на 15%.
Владата, исто така, посочи дека, со оглед на промените во безбедносната состојба, Министерството за одбрана ќе преземе чекори за модернизација на воздушната одбрана на Швајцарија според планот, кој предвидува дека на земјата ѝ се потребни од 55 до 70 модерни борбени авиони.
Ова потенцијално зголемување на бројот на авиони, покрај купувањето на F-35A, ќе биде разгледано без оглед на видот на авионот, прецизираше владата.
