Оставката на државниот јавен обвинител Љупчо Коцевски, од ВМРО-ДПМНЕ ја оценуваат како значајна победа за правната држава.
Според ВМРО-ДПМНЕ, со оваа оставка се става крај на мрачен период во кој Обвинителството било перципирано како партизиран механизам, а не како независна институција.
– За првпат и самиот обвинител го признава тоа што целата јавност го кажуваше: дека Јавното обвинителство не може да продолжи да функционира со изгубен легитимитет, под товар на политички влијанија и со селективна правда. Фактот што оваа оставка доаѓа дури сега, а не уште од првиот ден кога беше очигледно дека институцијата е компромитирана, само дополнително ја потврдува длабочината на проблемот и обидите со месеци да се одржи статус кво кое служеше на поранешната власт, изјави Бране Петрушевски од ВМРО-ДПМНЕ.
Оставката на Коцевски, вели Петрушевски, не е персонално, туку системско решение и почеток на демонтажа на заробените од СДС и ДУИ институции.
– Дали затоа и чекаше оставката да биде на последниот ден кога ќе биде разрешен за да им купи време на неговите наредбодавци? Исто така, дали е точно дека група обвинители на чело со Коцевски заташкуваат преку 40 случаи на висока корупција против корумпираните функционери на СДС, ДУИ и други партии?, прашува Петрушевски.
Коцевски денеска објави дека поднесува неотповиклива оставка пред да биде разрешен во Собранието.
На прес-конфернција одржана непосредно пред собраниската седница, Коцевски рече дека самата постапка за негово разрешување е правно неиздржана.
Од почетокот тврдев дека евентуалната постапка за мое разрешување е политичка одлука и затоа денеска поднесов неотповиклива оставка од функцијата Јавен овинител на Република Северна Македонија, рече Коцевски кој нагласи дека од функцијата заминува со крената глава
