Новата ФИФА ќе биде мобилна игра и ќе биде дистрибуирана преку… Netflix.
Се сеќаваме дека многу години правата за еден од најпрофитабилните брендови во гејмингот ги држеше Electronic Arts (EA). Сепак, во 2023 година, се појави расцеп во односите меѓу EA и Меѓународната фудбалска федерација, што наложи промена на името за најуспешната фудбалска серија – од FIFA стана EA Sports FC.
Сепак, сега ФИФА се врати.
„Следното лето, додека светот се собира за да го прослави Светското првенство во фудбал, навивачите ќе можат да ја играат обновената симулација на фудбалската игра ФИФА ексклузивно на Netflix Games“, се вели во официјалното соопштение на Netflix.
Играта е развиена од Delphi Interactive и ќе биде достапна за претплатниците на Netflix преку мобилната апликација на услугата. Ова значи дека новата FIFA ќе може да се игра само на оперативните системи iOS и Android. Во некои земји, ќе биде достапна и на некои телевизори.
Сè уште нема информации што точно можеме да очекуваме во однос на играта, визуелните ефекти и содржината, но фокусот речиси сигурно ќе биде на Светското првенство во САД, Мексико и Канада.
„Возбудени сме поради нашето партнерство со Netflix Games и Delphi Interactive пред Светското првенство во фудбал во 2026 година“, изјави претседателот на ФИФА, Џани Инфантино. „Оваа голема соработка е клучна пресвртница во посветеноста на ФИФА кон иновациите во светот на фудбалските игри. Нашата цел е да допреме до милијарди фудбалски фанови од сите возрасти низ целиот свет и да го редефинираме концептот на симулациски игри.“
Тој верува дека новата игра означува почеток на нова ера во дигиталниот фудбал.
