Поранешниот јапонски цар Акихито го прослави својот 92-ри роденден во вторник, а неговата срцева состојба се стабилизира по здравствените проблеми претходно оваа година, соопштија претставници на Царската палата.
Според Агенцијата за царско домаќинство, на Акихито му е дијагностициран намален проток на крв во срцевиот мускул во мај, но неговата состојба е стабилна откако започнал третман со нов лек во јули, објави АП.
Се додава дека тој продолжува редовно да ја посетува лабораторијата во палатата, каде што истражува риби гоби, област во која идентификувал десет нови видови во текот на својата кариера.
Акихито, кој е почесен цар од неговата абдикација во 2019 година, го прослави својот роденден со своето семејство и гости, вклучувајќи го и јапонскиот премиер Санае Такаичи.
Поранешниот цар е познат по своите напори да се соочи со военото минато на Јапонија – тој неколку пати оваа година им оддаде почит на жртвите и преживеаните за да ја одбележи 80-годишнината од крајот на Втората светска војна.
Тој и заслужната царица Мичико одржаа минута молчење на клучните датуми поврзани со војната, вклучувајќи ја Битката кај Окинава, атомските бомбардирања на Хирошима и Нагасаки и предавањето на Јапонија.
Акихито претходно нагласи дека војната, водена за време на владеењето на неговиот татко, царот Хирохито, не смее да се заборави.
Во август, тој и неговата сопруга ја посетија Каруизава, град во централна Јапонија каде што Акихито бил евакуиран како дете за време на војната и каде што подоцна се запознале.
