Американскиот претседател Доналд Трамп изјави дека на САД им е потребен Гренланд за „национална безбедност“ и дека „ние мора да го имаме“.
Како одговор на прашање на Би-Би-Си за новата улога на Џеф Ландри, републиканскиот гувернер на Луизијана, кој беше назначен за специјален пратеник за Гренланд, тој изјави дека Вашингтон „ќе мора да го реши тоа“ и дека на САД „им е потребен Гренланд за национална безбедност, а не за минерали“.
Американскиот претседател предизвика нов спор со Данска откако го назначи гувернерот на Луизијана, Џеф Ландри, за специјален пратеник за Гренланд, огромен арктички остров за кој рече дека сака да го анектира.
Премиерите на Данска и Гренланд, Мете Фредериксен и Јенс-Фредерик Нилсен, во заедничка изјава го повторија барањето за почитување на нивните граници, откако Ландри претходно изјави дека е „почестен што служи за Гренланд да стане дел од Соединетите Американски Држави“.
„Го кажавме тоа и претходно, го повторуваме и сега. Националните граници и суверенитетот на државите се засновани на меѓународното право. Не можете да анектирате други земји“, изјавија премиерите во заедничка изјава, објавува The Guardian.
Тие додадоа дека ова се „фундаментални принципи“.
„Гренланд им припаѓа на Гренландците и САД не треба да го преземат Гренланд. Очекуваме почитување на нашиот заеднички територијален интегритет“, се вели во соопштението.
Претходно, данскиот министер за надворешни работи Ларс Локе Расмусен изјави дека неговата земја инсистира дека сите, вклучително и САД, мора да го почитуваат „територијалниот интегритет на Кралството Данска“.
Портпаролот на ЕУ, Ануар Ел Ануани, исто така реагираше на изјавата на Ландри, велејќи дека територијалниот интегритет и суверенитетот на Кралството Данска мора да се зачуваат.
На почетокот од својот втор претседателски мандат, во јануари оваа година, Трамп ја објави својата намера да го стекне Гренланд, наведувајќи ја неговата стратешка позиција за безбедноста на САД, додека Данска, која ја контролираше арктичката територија во последните 300 години, одби да се откаже од Гренланд.
Ова не е прв обид на САД да го купат Гренланд од Данска, а првите такви преговори ги водеше американскиот државен секретар Вилијам Х. Сјуард во 1867 година, кога договорот не успеа.
Во 1946 година, САД понудија 100 милиони долари за територијата, оценувајќи ја како витална за националната безбедност, но данската влада го отфрли.
Трамп, исто така, се обиде да го купи Гренланд за време на неговиот прв претседателски мандат, но данската и гренландската влада ја отфрлија таа понуда во 2019 година.
