Илјадници американски работници и студенти учествуваа во протестни маршеви низ градовите и универзитетските кампуси во знак на протест против имиграциските политики на американскиот претседател Доналд Трамп, на првата годишнина од неговиот втор мандат, објави денес Ројтерс.
Според видеа на интернет, стотици демонстранти се собрале во Вашингтон и помалите градови, како што е Ешвил, Северна Каролина, каде што скандирале „Не ICE, не ККК, не фашистичка САД“, што се слогани против службата за имиграција и царина (ICE), како и американската десничарска организација Ку Клукс Клан, која е основана во Соединетите Држави во 1865 година и се смета за терористичка група.
Универзитетските студенти демонстрираа во Кливленд, Охајо, скандирајќи „Не омраза, не страв, бегалците се добредојдени тука“, додека средношколците во Санта Фе, Ново Мексико, излегоа од училница за да присуствуваат на митингот „Стоп на теророт на ICE“, според организаторите на протестите и училишните службеници.
Протестите беа организирани од левичарски групи како што се „Индивисибил“ и „50501“, како и од синдикати и локални организации кои се противат на центрите за притвор на имигранти, како оној во Ел Пасо, Тексас, каде што тројца притвореници починаа во последните шест недели, според федералните власти.
Протести се планирани и во текот на денот во западните градови како што се Сан Франциско и Сиетл.
Администрацијата на Трамп тврди дека има мандат од гласачите да депортира милиони имигранти кои се нелегално во земјата, додека неодамнешните анкети покажуваат дека повеќето Американци не ја одобруваат употребата на сила од страна на ICE и други федерални агенции.
