Германија и Италија одбиваат да се приклучат кон „Одборот за мир“ на Доналд Трамп, предупредувајќи дека статутот му дава преголеми овластувања и директно се судира со нивните устави.Германскиот канцелар Фридрих Мерц денеска изјави дека би бил подготвен да се приклучи на иницијативата на американскиот претседател Доналд Трамп за формирање Одбор за мир за Газа, но дека не може да го прифати планот во неговиот сегашен облик, додека италијанската премиерка Џорџа Мелони изјави дека го замолила Трамп да ги измени условите за приклучување кон неговиот Одбор за мир, објави Ројтерс.
– Во формата во која во моментов е воспоставен Одборот за мир, не можеме да ги прифатиме неговите управувачки структури во Германија поради Уставот – изјави Мерц на заедничката прес-конференција со италијанската премиерка Џорџа Мелони во Рим, пренесе Ројтерс.
Мерц истакна дека Германија е подготвена да истражи други форми на соработка со Соединетите Американски Држави, доколку целта е пронаоѓање нови формати што ќе придонесат за воспоставување мир во различни региони во светот.
Тој посочи дека овие формати не мора да бидат ограничени само на Појасот Газа и Блискиот Исток, туку би можеле да се применат, на пример, и на Украина.
Мелони: Ова сигурно не ни дозволува да потпишеме утре
Италијанската премиерка Џорџа Мелони изјави дека го замолила Доналд Трамп да ги измени условите за приклучување кон неговиот Одбор за мир, со цел да се решат уставните прашања што ја спречија Италија да му се приклучи.
Според италијанскиот устав, земјата може да се приклучи на меѓународни организации само под еднакви услови со другите држави, што, според оценката на Мелони, во моментов не е исполнето со статутот на Одборот за мир, кој му дава на Трамп широки извршни овластувања, пренесува Ројтерс.
Мелони претходно оваа недела изјави дека Италија ќе ја одложи одлуката за приклучување кон „Одборот за мир“ поради неусогласеноста на дел од статутот на тоа тело со италијанскиот устав.
– Ова сигурно не ни дозволува да потпишеме утре, но ни е потребно повеќе време. Има работа што треба да се заврши. Сепак, мојот став секако останува став на отвореност – изјави Мелони за државниот радиодифузер RAI.
Претходно, италијанскиот весник „Corriere della Sera“ објави дека Италија засега нема да учествува, наведувајќи загриженост дека приклучувањето кон тело што го предводи странски лидер би можело да ги прекрши уставните правила кои бараат рамноправен третман на државите.
Што е Одборот за мир?
Одборот за мир е ново меѓународно тело предводено од Соединетите Американски Држави, кое е основано со цел да ја надгледува повоената управа во Газа и потенцијално да биде вклучено во решавањето на други конфликти ширум светот.
Трамп минатата недела најави формирање на одборот во рамки на втората фаза од американскиот план во 20 точки за Појасот Газа, при што тој самиот би ја извршувал функцијата претседавач на тоа тело.
