Федерален судија ја блокираше администрацијата на претседателот на Соединетите Американски Држави, Доналд Трамп, да го прекине привремениот заштитен статус (TPS) за околу 350.000 Хаиќани, еден ден пред да истече нивната заштита од депортација.
Судијката на американскиот окружен суд, Ана Рејес, на неодредено време ја суспендираше одлуката на Министерството за внатрешна безбедност (DHS), со која ѝ се забранува на федералната влада да го одземе правниот статус и работните дозволи на корисниците на TPS, како и да ги апси и депортира, објави CBS.
Во своето образложение за одлуката, Рејес оцени дека одлуката на министерката за внатрешна безбедност, Кристи Ноем, да го прекине TPS за Хаиќани била „произволна и каприциозна“ и е во спротивност со Законот за административна постапка.
Таа рече дека Ноем не ја разгледала доволно безбедносната ситуација во Хаити, која се соочува со политичка нестабилност, насилство на банди и широко распространета сиромаштија.
Судијата, исто така, рече дека одлуката делумно се темели на „расна нетрпеливост“, повикувајќи се на претходните изјави на Ноем и Трамп за Хаити и имигрантите.
Министерството за внатрешна безбедност соопшти дека размислува да поднесе жалба до Врховниот суд на САД.
Портпаролката на Министерството за внатрешна безбедност, Триша Меклафлин, рече дека TPS за Хаити никогаш не била наменета да биде трајно решение и ги обвини претходните администрации за продолжување на програмата со децении.
Програмата TPS е основана во 1990 година и се користи за обезбедување привремена заштита на странци од земји погодени од војна, природни катастрофи или други вонредни состојби.
Администрацијата на Трамп покрена постапка за прекинување на поголемиот дел од програмата TPS, што би можело да доведе до депортација на стотици илјади имигранти од повеќе земји, објави CBS.
