Луѓето со големо депресивно растројство можат да доживеат брзо и трајно подобрување по еднократна доза на психоделичниот лек диметилтриптамин (DMT), кој се користи во шаманските ритуали, кога се комбинира со психотерапија, според резултатите од клиничко испитување.
Клиничкото испитување, во кое учествувале 34 лица, покажа дека психоделичната терапија предизвикала брзо намалување на депресивните симптоми, кое траело долго откако лекот престанал да делува, при што некои сè уште ги чувствуваат придобивките шест месеци подоцна, објавува денес Гардијан.
„Постои непосреден антидепресивен ефект кој значително се одржува во период од три месеци и тоа е возбудливо бидејќи ова е еднократна сесија на лекот, со психолошка поддршка“, рече Дејвид Ерико, психијатар на Империјал колеџ во Лондон, кој ја спроведе студијата.
Иако прелиминарни, резултатите се додаваат на растечкиот број докази дека психоделичните лекови, кога се комбинираат со психотерапија, можат да помогнат во ублажување на депресијата кај милиони луѓе ширум светот кои не реагираат на постојните антидепресиви или терапии.
Се проценува дека 100 милиони луѓе ширум светот имаат депресија отпорна на третман, дефинирана како големо депресивно растројство кое не реагира на најмалку два антидепресиви, а околу половина од нив не се во можност да извршуваат секојдневни рутински задачи.
ДМТ е активната состојка во ајахуаската, која се користи во шаманистичките ритуали во Јужна Америка.
Дрогата предизвикува моќни и често мистични халуциногени патувања кои можат да го променат чувството за време и простор кај луѓето, да го растворат нивното чувство за себе и да предизвикаат средби со натприродни суштества.
