Времето денеска ќе биде топло, наместа со појава на пороен дожд и услови за ретки грмежи, а веќе од утре под влијание на влажна и постудена воздушна маса ќе биде облачно со врнежи од дожд кои наместа ќе бидат пообилни односно се очекува да наврнат од 15 до 20 l/m2.
Поради продор на постуден воздух од север, врнежите од дожд на планините ќе преминуваат во снег. Од петок до крајот на неделава ќе се задржи променливо облачно и нестабилно време со повремени врнежи од дожд и ќе дува умерен, до засилен ветер од северен правец, кој повремено ќе надминува брзина од 60 km/h. Температурата ќе биде во опаѓање, а утринската наместа ќе се спушти и под нула.
Според прогнозата на Управата за хидрометеоролошки работи, денеска минималната температура ќе биде во интервал од 3 до 9, а максималната ќе достигне од 20 до 25 степени.
Во Скопје ќе преовладува сончево време со мала до умерена облачност и услови за слаб локален дожд. Ќе дува слаб до умерен ветер од северен правец. Минималната температура ќе се спушти до 7, а максималната ќе достигне до 24 степени.
