Српскиот претседател Александар Вучиќ изјави дека за десет дена ќе ја имаме одлука за изборите.
„Секако ќе имаме одлука за десет дена. Нема стапици кога станува збор за избори. Народот, народот одлучува каква иднина сака и кому сака да му ја довери. Мислам дека изборите се многу важна работа. Исто како што отсекогаш велев дека државата не е играчка, изборите се исклучително важни, секогаш“, рече Вучиќ, зборувајќи на ТВ Инфомер во вторник вечерта.
Тој додаде дека граѓаните, кога ја избираат својата иднина, мора да ги изберат оние луѓе кои најдобро ќе ги заштитат и зачуваат интересите на земјата.
„Изборите се момент на вистината за сите вклучени во оваа работа, но тоа е првенствено прашање за иднината на земјата и иднината на народот, а не за нас“, нагласи Вучиќ.
Тој изјави дека не станува збор за неговата судбина, лична или туѓа, туку дека е прашање на милиони луѓе во оваа земја.
Претседателот на Србија изјави дека изборите ќе се одржат оваа година, кога е најповолно за државата.
„Изборите ќе се одржат оваа година, кога најмалку ќе ѝ наштетат на државата, кога е најповолно за државата“, рече Вучиќ.
Тој нагласи дека државата не е играчка и дека државата мора да биде доволно силна и економски и политички, како и да има добро раководство кое ќе знае како да се спротивстави на уривањето на државата.
Претседателот Вучиќ нагласи дека во неговиот професионален живот, претстојната посета на Кина ќе биде најважна, пред сè поради граѓаните на Србија, додавајќи дека за еден месец, кинескиот претседател Си Џинпинг ќе го прими американскиот претседател Доналд Трамп, рускиот претседател Владимир Путин и него.
„Во мојот професионален живот, ова сигурно ќе биде најважната посета за граѓаните на Србија. Ќе биде пет или шестдневна посета. Државна, официјална посета. Големиот кинески претседател, нашиот пријател Си Џинпинг, ќе ги прими Трамп, Путин и мене за еден месец“, рече Вучиќ.
