Министерството за правда на САД го обвини Кол Ален, човекот обвинет за обид за атентат врз американскиот претседател Доналд Трамп, за напад врз полицаец.
Во новите обвиненија се тврди дека Ален пукал во агент на американската тајна служба на безбедносен контролен пункт во хотелот Хилтон во Вашингтон, каде што се одржувала гала вечера на Здружението на дописници од Белата куќа, објавува Ројтерс.
По другите три точки од обвинението, Ален е обвинет за обид за убиство на Трамп, пукање со огнено оружје за време на насилно кривично дело и нелегално пренесување огнено оружје преку државни граници.
На годишната вечера на Здружението на дописници од Белата куќа, на која присуствуваше американскиот претседател Доналд Трамп во ноќта меѓу 25 и 26 април во хотелот Хилтон во Вашингтон, вооружен човек идентификуван како Кол Томас Ален (31) испукал повеќе истрели, по што сите присутни биле евакуирани.
Извор запознаен со истрагата изјави за Си-Би-Ес дека биле испукани шест истрели – еден од Ален и пет од агентот на Тајната служба, кој бил погоден во панцирот.
Два извори запознаени со истрагата рекоа дека истрелот веројатно го погодил мобилниот телефон во џебот на агентот.
Федералните власти ги оспорија извештаите дека истрелот што го погодил агентот бил таканаречен „пријателски оган“.
