Повеќе од 80 проценти од словенечките граѓани веруваат дека членството во Европската Унија донело придобивки за нивната земја, според новата анкета на Евробарометар објавена по повод Денот на Европа.
Според анкетата, 81 процент од испитаниците во Словенија веруваат дека членството во ЕУ е предност, додека просекот низ Унијата е 72 проценти, објави СТА.
Меѓу земјите-членки, најголем удел на позитивни ставови е забележан во Ирска – 93 проценти, додека најнизок е во Бугарија – 54 проценти.
Анкетата, исто така, покажува дека 75 проценти од граѓаните низ ЕУ се чувствуваат како граѓани на Европа.
Во сè посложен глобален контекст, 73 проценти од испитаниците во ЕУ ја гледаат Унијата како фактор на стабилност.
Во Словенија, ова мислење го делат 71 процент од граѓаните, додека 27 проценти не се согласуваат.
Покрај тоа, 81 процент од испитаниците во ЕУ поддржуваат заедничка европска одбранбена политика, што е највисоко ниво на поддршка во последните две децении.
Анкетата, исто така, покажува дека 55 проценти од Европејците поддржуваат посилен одговор на ЕУ на војната во Украина, додека 76 проценти веруваат дека рускиот напад врз Украина претставува безбедносна закана за ЕУ.
Во Словенија, 37 проценти од испитаниците се задоволни од одговорот на ЕУ, додека 54 проценти се незадоволни.
Анкетата е спроведена помеѓу 12 март и 5 април на примерок од 26.415 луѓе во 27-те земји-членки на ЕУ.
