Војната на Соединетите Американски Држави со Иран досега ги чинеше компаниите ширум светот најмалку 25 милијарди долари, а трошоците продолжуваат да растат поради повисоките цени на енергијата, нарушувањата во синџирите на снабдување и нарушувањата на трговските патишта, објави Ројтерс.
Според британската агенција, најмалку 279 компании од Соединетите Американски Држави, Европа и Азија изјавиле дека конфликтот ги принудил да преземат мерки за ублажување на финансиските загуби, вклучително и зголемување на цените на производите, намалување на производството, суспендирање на дивидендите и испраќање на работниците на принуден одмор.
Компаниите, исто така, воведуваат дополнителни доплати за гориво и бараат итна владина помош за ублажување на последиците од конфликтот, кој влезе во својот трет месец.
Извршниот директор на „Вирлпул“, Марк Бицер, изјави дека падот на индустриската активност е споредлив со периодот на глобалната финансиска криза, откако компанијата ја преполови својата годишна прогноза за бизнисот и ги суспендираше исплатите на дивиденда.
Компании како „Карекс“, „Тојота“ и „Проктер и Гембл“, исто така, предупредија за последиците од конфликтот.
Блокадата на Ормутскиот теснец од страна на Иран ги искачи цените на нафтата над 100 долари за барел, што е повеќе од 50 проценти над нивото пред војната.
Затворањето на клучен превознички пат ги зголеми трошоците за транспорт и го отежна снабдувањето со суровини како што се ѓубрива, алуминиум, хелиум и полиетилен.
Ројтерс објави дека една петтина од анализираните компании пријавиле директна финансиска штета, при што компаниите од Европа и Азија се најтешко погодени поради нивната голема зависност од енергијата од Блискиот Исток.
