Американскиот државен секретар Марко Рубио изјави дека е постигнат „значаен напредок“ во преговорите со Иран.
Коментарите на Рубио дојдоа откако претседателот Трамп објави дека мировниот договор со Иран е „главно постигнат“ и најави повторно отворање на Ормутскиот теснец. Според неименуваниот извор, регионалните лидери вчера го повикаа Трамп да го прифати рамковниот договор откако ќе го разгледа најновиот ирански предлог.
Од друга страна, медиумите блиски до иранските власти објавуваат дека Техеран не се согласил на никакви нови мерки поврзани со неговата нуклеарна програма. Тие исто така истакнуваат дека сообраќајот по таа морска рута „нема да се врати во состојбата во која бил пред војната“.
Министрите на Оман и Иран денес разговараа за Ормускиот теснец, објави државната новинска агенција на Оман.
Министерот за надворешни работи на Оман се сретна со иранска делегација предводена од иранскиот заменик-министер за надворешни работи Казем Гарибабади.
Според агенцијата, министерот за надворешни работи на Оман, Саид Бадр бин Хамад ал Бусаиди, добил порака од иранскиот министер за надворешни работи, кој не бил присутен на состанокот, во која се нагласува желбата на двете земји да ја обноват слободната пловидба низ Ормутскиот теснец „на безбеден и одржлив начин“.
Потоа двете страни одржаа проширен состанок на кој разговараа за принципите што ќе ја регулираат слободата на пловидба низ Ормутскиот теснец во согласност со меѓународното право.
„Аксиос“ и „Си-Би-Ес“ објавија дека денес не се очекува договор со Иран, а анонимен висок функционер во администрацијата на претседателот Доналд Трамп изјави за „Аксиос“ дека сè уште треба да се договорат голем број детали.
Истиот функционер додаде дека иранската влада во моментов е бавна во донесувањето одлуки и дека може да потрае неколку дена за договорот да помине низ сите потребни процедури и одобренија.
