Соединетите Американски Држави објавија нови правила за издавање „зелени карти“. Апликациите сега ќе се поднесуваат само од местото на раѓање на лицето кое сака да го добие документот, објавува „Вашингтон пост“.

Повеќе од 50 години, странците со легален статус, т.е. со соодветна виза, имаат можност да аплицираат и да поминат низ целиот процес на добивање постојан престој во Соединетите Американски Држави од самата земја. 

Според експертите, промената на правилата сериозно ќе влијае на бизнисите бидејќи стотици илјади ќе бидат принудени да ја напуштат земјата за да го исполнат барањето.

Во соопштението од Службата за државјанство и имиграција на САД се наведува дека странците кои привремено престојуваат во САД и сакаат да аплицираат за статус на легален постојан престој или за носители на зелена карта, мора да се вратат во својата матична земја и да аплицираат таму, освен во „вонредни околности“.

„Неимигрантите, како што се студентите, привремените работници или лицата со туристички визи, доаѓаат во Соединетите Држави за краток временски период и со одредена цел. Нашиот систем е дизајниран така што тие ја напуштаат земјата кога ќе заврши нивната посета. Нивната посета не треба да служи како прв чекор во процесот на добивање зелена карта“, се вели во соопштението на агенцијата.