Во соопштение објавено на социјалната мрежа X, Сибиха, исто така, повика на „соодветен и силен одговор на агресорот“ по ноќните напади, кои главно беа насочени кон регионот на Киев, а во кои беше употребена балистичката ракета со среден дострел „Оресник“.

Сибиха ја обвини Русија дека се обидува да го компензира недостатокот на воен напредок на фронтот во својата агресивна војна против Украина со „варварски ракетни напади“.

Најмалку две лица загинаа само во Киев. Според градоначалникот Виталиј Кличко, бројот на повредени во главниот град се искачи на 81. Украинскиот претседател Володимир Зеленски објави на социјалните мрежи дека околу 100 лица се повредени, а најмалку четворица се убиени во напади низ целата земја.

Според информациите од властите, во нападите биле оштетени и владини згради, вклучувајќи го Министерството за надворешни работи и зградата на Владата. Нападите се случиле на државен празник.

„Путин се обидува да ја заплаши Украина со напаѓање на цивили и уривање на станбени згради, музеи, училишта и критична инфраструктура“, рече министерот за надворешни работи Сибиха.

Меѓународната заедница мора да реагира, рече Сибиха. „Ги повикуваме нашите партнери да преземат решителни мултилатерални мерки за да ја одвратат Русија и да ја убедат да се посвети на сеопфатен, праведен и траен мир.“