Францускиот претседател Емануел Макрон денес изјави дека француската морнарица се качила на уште еден танкер за нафта под меѓународни санкции, „Тагоре“, кој отпловил од Русија.
„Нашата решителност е непоколеблива и апсолутна. Оваа операција е спроведена во Атлантскиот Океан, на отворено море, со поддршка на неколку партнери, вклучувајќи го и Обединетото Кралство, и во строго почитување на поморското право“, рече Макрон во објава на социјалната мрежа X.
Според него, „неприфатливо е бродовите да ги заобиколуваат меѓународните санкции, да го кршат поморското право и да ја финансираат војната што Русија ја води против Украина повеќе од четири години“.
„Овие бродови, кои ги игнорираат дури и најосновните правила на поморската пловидба, исто така претставуваат закана за животната средина и безбедноста на сите“, заклучи Макрон.
